بيـوت زمـان
بيـوت زمان
بيوت من، طين
بس جواه حنين السنين
اغلي من الدهب والماس
وأغلي من المرجان
ابوابها احسان مفتوحة لكل الناس
سلالم من خشب صفوان
تستحمل لعبنا أحنا العيال
وصوت ستنا وهي تنادينا
للغدا نتلم أوام
حوالين طبليه كبيرة تجمع أهالينا
بشوق و سلام
مش مهم نوع الطعام
المهم لمتنا في المكان
وحكاوي اهالينا عن زمان
لما كانوا زينا عيال
و ضحكه جدنا تعلي بصداه
تحلي الحياة
لما، يحكي عن غرامه بستي
و عن ابويا لما كان بيحب
بنت الجيران
ولا عمي لما كان عاشق مجنون
لسماع أم كلثوم و حليم
ليل و نهار
و عمتي خايفه أحسن جدي
يكشف سرها كمان
ولا خالتي لما تخانق أمي
علشان فستان
و لاخالي لما جاب درجه وحشه
في الامتحان
واحنا نسمع الحكاوي بأنبهار بضحكة صافيه كانها أفلام
مافيها ملل ولا عنف ولا احزان
ونفضل نسمع ونسمع كان وكان
وكان
كأنّها احلام جميله مش عاوزينها
تنتهي ولا عاوزين معاها ننام
كان زمان البيوت مش حيطان البيوت مصنوعه من طوب الحنان
من قلوب نبضها ألحان
من وفاء و امان بصوت كمان
تحكي قصة حب كان
في، بيت يملأه صوت كروان
مش غربان
لما كان جدنا وستنا والعمه والخاله
والخال والعمام
كلنا عايشين بالحب زمان
ولينا كبير نخضع ليه كلنا بأحترام
وقت المشاكل حمال جبال
حلال
آه و آه من حلاوه وجمال بيوت زمان
مصنوعه من دم ولحم
و كيان
ينبض بالحياه
كانت أمان بدفء المشاعر والحنان
مش طوب و حيطان
بيوت زمان بيوت محبه و سلام
بيوت ايمان
.... Fady ....
بقلم.... فادي عبدالكريم زكي
تعليقات
إرسال تعليق